C vitamini immun sistemi ilə əlaqəli vitaminlərdən biridir. Askorbin turşusu olaraq da bilinən C vitamini suda həll olunan bir vitamindir. Bu səbəbdən C vitamini bədəndə depolanmır. Ehtiyac duyduğundan artıq C vitamini bədəndən sidik yolu ilə xaric olunur. Buna görə də C vitamini mütəmadi olaraq qəbul edilməlidir.
C vitamini bir sıra qida vasitələrinin tərkibində vardır, bəzən isə qida əlavəsi kimi də qəbul olunur.

C vitamininin konsentrasiyası insan toxumalarında dəyişir. C vitamini ən çox limfositlərdə, hipofizdə və böyrəküstü vəzlərdə olur. Bu C vitaminin rolunun nə qədər vacib olduğunu göstərir:

• Limfositlərin əsas funksiyası antitel (antikor) istehsalı və immunoloji yaddaşdır.
• Hipofiz - metabolizmanın bütün növlərinə təsir edən stimullaşdırıcı hormonların istehsal mərkəzidir.
• Böyrəküstü vəzlər isə bədənimizin stres əleyhinə müdafiəsini təmin edir.

Beləliklə yaşamımızı təmin edən əsas orqanların və toxumaların normal fəaliyyəti üçün C vitamini vacibdir.

Sinqa xəstəliyi - C vitamini çatışmamazlığının son dərəcəsidir və günümüzdə praktik olaraq rastlanılmır. Lakin bu vitaminin çatışmamazlığı ilə əlaqəli bir çox əlamətləri müşahidə edə bilərik:

• diş ətinin qanaması
• iştahsızlıq
• immunitetin zəifləməsi
• uşaqlarda yavaş böyümə
• yaddaş zəifliyi
• burun qanaması
• diş çürükləri
• göz altındakı dairələr
• anemiya
• quru və zədələnmiş dəri
• dərinin tez göyərməsi
• gec sağalan yaralar
• qırılan saçlar
• dırnaqlarda qırmızı nöqtələ və s.

C vitamininin çatışmamazlığının əmələ gəlməsi üçün risk faktorları:

• duzgün qidalanmamaq
• xroniki stres!!
• xroniki iltihab
• hamiləlik
• mədə şirəsinin aşağı turşuluğu
• mütəmadi spirtli içkilərin qəbulu

Vitamin C ilə zəngin qidalar:

• Qırmızı bibər
• Portağal
• Qreypfrut
• Kivi
• Çiyələk
• Yaşıl bibər
• Brokoli
• Brüssel kələmi
• Gül kələmi

Gündə nə qədər C vitamini almalısınız?

☑️Qadınlar 75 mq
☑️Kişilər 90 mq
☑️Hamiləlikdə 85 mq
☑️Süd verme zamanı 120 mq
☑️Siqaret çəkənlər isə gündəlik 35 mq daha çox C vitamini qəbul etmələri tövsiyə olunur.

Böyük ölçüdə portağal və ya 2 kivi meyvəsi gündəlik C vitamini ehtiyacınızı qarşılaya bilər.

  Endokrinoloq Dr.Sevinc Ağaqızı